آه يا مصر وألف آه
آه يا مصر علي دم سال
من صدر وِلدك ..لما قال
عايز أغير من حال لحال
ولدي بص وشاف دمار
ببراءة قال.. أسأل سؤال
هٌما دول الإحتلال؟؟
***
آه يا مصر وألف آه
علي قلب الأم اللي إنفطر
وناس قلوبها كما الحجر
الورد فتح تحت الشجر
بعد ما قولنا ضاع الأمل
فـ لحظة قال ..أنا ما أنكسر
أنا شعب إتعود ينتصر
***
آه يا مصر وألف آه
من اللي سرقني و نهبني
اللي خد خيرك وباعني
اللي ظلمني و حبسني
اللي غرقني وحرقني
واللي خلاني غريب فيكي
وحشتيني....
تعالي فـ حضني ضُميني
***
آه يا مصر وألف آه
مـ الضماير اللي ماتت
مـ الأيادي اللي باعت
مـ نفوس ليكي خانت
ريحت الفساد فاحت
وإرادة المولي شاءت
وولادك قامت ما خافت
***
آه يا مصر وألف آه
الوشوش غير الوشوش
العابس أصبح بشوش
يا جدع حلق حوش
علي الحرامي إبن البرطوش
أسمه عز ومستفز
لو حد شافه ما يرحموش
***
آه يا مصر وألف آه
يا مصر عدي الأزمه عدي
إيد علي إيد الكل يبني
ولادك رجعوا ما تاهوا
والكل بيهم بيتباهوا
ياما قالوا الشباب ضاعوا
وفي الأخر هما اللي قاموا
***
آه يا مصر وألف آه
محروسة من رب العباد
مهما عاس فيكي الفساد
نضرب في الأرض نقطع جذوره
بإيد ولادك الشداد
يا مصر يامه يا أم البلاد
***
آه يا مصر وألف آه
من اللي حاقد واللي شامت
واللي متلون وباهت
وإستغلال حالة الميدان
وتجيلنا كلمة من إيران
وأمر أل من الأمريكان
خليك في حالك يا خواجه
مصر ولادها رجاله
***
آه يا مصر وألف آه
يا ظُلم روح إختفي
يا نار الفتنه إنطفي
مصر مش راح تتحرق
وولادها مش ممكن تفترق
يا مصر يا قلب الأمه النابض
يحميكي المولي ويحمي ولادك
*******
15 التعليقات:
واخيرا عدت بعد غياب
وعدت بكلمات ليست كــ الكلمات
رائحة النصر تفوح منها
رغم مصاحبتها ألم وآآآهات
لا تتأوه يا هيثم فمصر حره دائما وابدا
وستبقى كما هي أم الدنيا
وستبنى من جديد بروح ابناءها الأوفياء
قصيدة لها من العبق ما عطر المكان
لك تحية خاصة بعبير النصر هناك :)
علي فكرة انا معنديش دم
فعلا انا اللي مش خدت بالي خالص من انك يا استاذ رجعت وكتبت القصيدة الجميلة دي
انا مش هاقول رأيى لانك عارفه طبعا من زمان
حمد الله ع السلامة
وياريت بجد مش تغيب ان شاء الله كل اسبوعين مرة
تحياتي
هيفاء أشكرك علي شعورك الجميل وكلماتك الرائعه, ولا أُخفيكِ سراً إني أكون سعيد جداً عندما ألمس تلك المشاعر من غير المصرين تجاه مصر وكلماتك تثبت لي ما أعتقده دائماً أن كل الشعوب العربية علي قلب واحد تفرح لبعضها البعض وتحزن لبعضها البعض وأن بعض الخلافات ما هي إلا أوهام ولكن المعادن الأصيله تظهر وقت الشده, مره أخري اشكرك من كل قلبي علي كلماتك الجميلة التي تتشرف بها صفحتي دائماً.
تحياتي
Haytham Alsayes
ما تقولش كده يا أستاذ هيثم , العفو يا فندم , وإنت عندك حق الناس نسيت المدونه من كتر ما بغيب وأنا فعلاً مُقصر جداً في المدونه وكمان مع أصدقائي الأعزاء لكن بدخل من وقت للتاني لكن للأسف مش بكتب تعليقات.
صديقي هيثم اشكرك علي تواجدك الجميل وإن شاء الله أحاول ماغبش تاني.
تحياتي وتقديري
هـــــــــيثم
كل ده غياب
غياااااااابك طال اوى اوى
اه واه واه يا مصر
مجموعة من الاهات على ما وصلنا اليه مصر كانت ام الدنيا وكنا نهزر ونقول طيب فين ابوها دلوقتى انا مش عارفه احنا وصلنا لايه والخوف كمان من اللى جاى
كلماتك مكتوبه بمشاعر عاليه اوى اوى وده مش غريب عنك يا هيثم
بلاش تغيب تانى لو سمحت وفى انتظار كل ما هو جديد وجميل منك
زهــــــراء
هيثم
ايه اخبارك
وحشنا وجودك ومرورك
فعلا أه والف أه يا مصر
احساسك متميز وصادق
يسلم قلبك يا جميل
وأختالت كـ عروس بتاج ثورتها وتغنت بين الشعوب لتبقى كما كانت أم الدنيا فمن ينسى أهرامها ونيلها لتبقى في القلب فهذا مكانها "
؛؛
؛
هيثم
حرفك الشامخ
جعل من مصر الحبيبة تبتسم
والذي نفسي بيده أن عشقها في قلبي لايقل لعشقي لبلدي فكن فخوراً بها كما نفخر نحنُ بها ..نص صادق بمشاعر الوطن
؛؛
؛
مصافحة أولى
لروحك عبق الغاردينيا
كانت هنا
reemaas
زهراء
إزيك يا زهرا إن شاء الله يكون اللي جاي أحسن وأفضل لمصر والمصريين , بشكرك جداً علي وجودك الجميل.
تحياتي
ساسو
بشكرك يا ساسو علي تواجدك وحمدالله علي السلامه أنا طبعاً مش بدخل علي المدونه دلوقتي غير قليل جداً يعني مش زي الاول خالص , بشكرك مره تانيه علي تشريفك للمدونه.
تحياتي
ريماس
وجودك الأول هنا أسعدني كثيراً وكلماتك الجميلة أسعدتني جداً التي عبرتي من خلالها عن حبك لمصر فأنتي لا تعلمي مدي فرحي وسعادتي عندما أجد أحد غير مصري يحب مصر وكم كنت أتألم من كلمات بعض الإخوه العرب الذين أكن لهم ولبلادهم كل حب صادق وإحترام عندما كانوا ينتقدوا مصر والمصريين , أشكرك جداً جداً علي تواجدك الأول والمميز ويارب تزوري مصر قريب وتستمتعي بكل شيء بها, وكمان يارب أزور المملكه قريب فكم أنا مشتاق إليها.
تحياتي
** هيثم **
مسائك الغاردينيا وعطره مررت للبحث عن جديدك لأنني للأسف لم أفعل متابعتك في أخر مرة كنت هنا فقرأت حرفك وأبتسمت سعادة بـ طهر قلبك النقي ورب السموات أعشق مصر كـ عشقي للسعودية ولي فيها ذكريات منذ الطفولة لازالت عالقة بـ القلب والروح فقد زرتها مراراً ولازلت أحلم بـ العودة اليها من جديد فمن يعرفها يحبها وتبقى طيبة بأهلها العشريين وقلوبهم الطيبة وخفة دمهم :)
كن فخوراً ياهيثم بمصر وتأكد أنني أفخر بحبها واهلاً بكِ في المملكة فهي وطنك الثاني "
؛؛
؛
لروحك عبق الغاردينيا
كانت هنا
reemaas
ريماس
أشكرك عل إهتمامك ومتابعتك , وأشكرك جداً جداً علي ردك في تعليقك الثاني فهذا شيء يسعدني جداً , وبالنسبه للجديد فزي ما إنتي شايفه المدونه تقريباً مهجوره لأني بقالي فتره مهمل فيها ومش بنزل حاجه غير علي فترات بعيده وأصبحت قليل الإهتمام بها وكمان هروح فين وسط عمالقة التدوين مثلك ومثل هيفاء ,لكن ربنا يسهل ويبقي في جديد إن شاء الله .
الا بالمناسبه إيه بقي الغاردينيا دي؟؟ هههههه
أنا أعرف إسمها غردينيا أو جردينيا بس ماكنتش عارف يعني إيه بس هي شكلها زهره ذو عطر مميز ..صح؟؟
مساء الغاردينيا هيثم
ازيك ؟ يارب تكون كويس
وبلاش كسل عاوزين نشوف جديدك بإذن الله ههههه وبجد سوري جداً لتأخري عن الرد على سؤالك والغاردينيا فعلاً زهرة وسميت كذلك زهرة الحب طبعا انا بعشقها جداَ وزارعة كم وحدة عندي في حديقة البيت هههههه
ولايهمك ياسيدي دي معلومات صغننه عنها "
؛؛
؛
الغاردينيا من عائلة الياسمين أصلها من الصين و اليابان
و هى من النباتات دائمة الخضرة، يصل طولها فى الحدائق إلى المتر و النصف،
تنمو الغاردينيا جيدا إذا توفر لها الجو المعتدل
و الرطوبة العالية و الإضاءة القوية غير المباشرة.
الغاردينيا مشهورة بصعوبة تربيتها، تصعب
حتى على مربى النباتات المحترفين.
تحتاج الغاردينيا إلى ضوء كثيف غير مباشر، و جو ذو رطوبة عالية،
و تربة مبللة بإعتدال و أسمدة متوازنة.
أول مرة ترى فيها الغاردينيا فى المشتل أو بائع النباتات،
تسحرك فى الحال برائحتها الزكية و أوراقها الخضراء الداكنة و اللامعة الغنية.
و لا تملك إلا أن تشتريها فى الحال لتربيتها بنفسك أو كهدية إلى أحبائك
***
زهرة الغاردينيا هي من اجمل احلى انواع الزهور وتتمتع برائحة جميلة جدا وهي تستحق ان تكون ملكة الأزهار واناأحب أسميها زهرة الحب
وهي من عائلة(rubiaceecs)
نوعها:الأوراق صلبة ذات لون اخضر لامع ,طول الورقة من(5-10سم)وعرضها(3سم)
منشأها:الصين واليابان ..
الوصف:يبلغ ارتفاعها في الأصيص حوالي (45سم)وينمو بمعدل (15سم)سنويا,ومعظم الأنواع تتفتح ازهارهافي فصل الصيف,وعادة تتفتح الأزهار من شهر أيار وحتى شهر أيلول ,وهي ذات لون كريمي ,ولها رائحة زكية جدا ....
ولتنظيفها يكفي رشها بالماء في غياب الأزهار ,ويجب إبعاده عن التيارات الهوائية الجارية ,وعن الغازات والدخان ..
الإضاءة :تحتاج لإضاءة جيدة بعيدا عن أشعة الشمس المباشرة ..
وجود الرطوبة الجوية العالية ,ودرجة الحرارة العالية يؤدي إلى احتراق النبات ..وموته
السقاية:تسقى بماء غير كلسي ,فترة نموه في فصل الشتاء بطئ بالمقارنة مع نموه في فصل الصيف ,ومعدل السقاية (2-3)ريات في الأسبوع صيفا ,ورية واحدة في الأسبوع شتاء..
***
ودي صور ليها ..
http://www.palvoice.com/forums/imgcache08/48116.gif
http://www.mobdi3ine.net/uploads/13027687545.bmp
http://www.law-syr.com/up/uploads/images/law-syr23eeeb9a8a.jpg
ومساء عبق بالغاردينيا يارب
كانت هنا
reemaas
شكراً ريماس علي إهتمامك وعلي توضيحك للمعني وعلي صور الغاردينيا الجميلة.
تحياتي وتقديري
هيثم
اخبارك ايه
يارب تكون بخير دايما
إرسال تعليق