محلاكي يا ليلة رمضان
أنا فاكر ليلة رمضان
أهنيهم بشهر القرآن
وللفانوس علقنا
والزينة قمنا ولزقنا
من شباك خاله شفيقه
لحد اوضة حنتيرة
وكنفاني نصب علي النصية
وكل الناس بقت هايصه
عَمال يلف علي الصاجه
دي كنافة أخر آلاجه
وقطايف كبيرة وعصافيري
وتمنها علي أد ايدي
وبتاع الفول علي الميدان
وجنبه بتاع عيش غلبان
وجبت شوية فول وزتون
وزبادي وفجل وحبة لمون
وشوية وجه عمنا شعبان
يدق الطبله تصحي النعسان
وينادي علي طلبه ومرسي
والواد سيد وعم حسني
وكله قام عشان السحور
ماهو لسه بدري علي الفطور
والفجر قال الله اكبر
يالا يا حوده يالا يا عنتر
ع الجامع روحنا وصلينا
وللشمس قعدنا استنينا
واليوم عدا بسرعة علينا
ورُحت علي عمي ابو سكر
ده عرقسوسه زي السكر
وقعدت استني المدفع
يضرب بسرعة ويطرقع
وباسم الله سمينا
وع الفطار اتلمينا
واتفرجنا علي بكار
لحد ما خلصنا فطار
وبسرعة لقيت كله قام
ع العشا وصلاة القيام
رحُت مع ابويا وصلينا
وعلي الحبايب عدينا
ورجعت ع البيت أغير
وخدت اخويا الصغير
وناديت علي هيمه وانور
وجبنا الكرة ولعبنا
لحد ما كلنا تعبنا
والايام عدت أوام
وعم شعبان غير الكلام
بوم.... بوم...... بوم.......
الوداع الوداع يا شهر الطيبات
الوداع الوداع يا شهرالبركات
الوداع الوداع يا شهرالحسنات
الوداع الوداع يا شهر الصلوات
كُتبت في 2006
